BAKI, VOA, Nailə Babazadə

Çin hökuməti ABŞ Prezidenti Donald Trampın Hörmüz boğazında gəmiçiliyin təhlükəsizliyini təmin etmək məqsədilə qurmağı planlaşdırdığı beynəlxalq hərbi koalisiyaya qoşulmaq məsələsində tərəddüd etdiyinə dair işarələr verib.

VOA xəbər verir ki, Çin Xarici İşlər Nazirliyinin sözçüsü Lin Sien Pekində keçirilən brifinqdə rəsmi Pekinin bu koalisiyaya dəvət alıb-almadığı və boğaza hərbi gəmilər göndərib-göndərməyəcəyi ilə bağlı suallardan yayınıb. Sözçü Hörmüz boğazındakı gərginliyin qlobal enerji və mal tədarükünə mənfi təsir göstərdiyini bildirərək, bütün tərəfləri hərbi əməliyyatları dərhal dayandırmağa və eskalasiyadan qaçmağa çağırıb.

Prezident Donald Tramp isə "Air Force One" təyyarəsində jurnalistlərə verdiyi açıqlamada, boğazdan keçən neftin təxminən 90 faizinin Asiya və Avropa ölkələrinə getdiyini xatırladaraq, Çin, Fransa, Yaponiya, Cənubi Koreya və Böyük Britaniya kimi dövlətləri öz gəmilərini bölgəyə göndərməyə səsləyib. O, həmçinin "Financial Times" qəzetinə müsahibəsində Çinin bu məsələdə yardım edib-etməyəcəyindən asılı olaraq, bu ayın sonuna planlaşdırılan rəsmi Pekin səfərini təxirə sala biləcəyini diqqətə çatdırıb. Çin tərəfi isə bu hədəli bəyanatlara cavab verməkdən imtina edərək, bütün tərəflərlə rabitədə olduqlarını qeyd etməklə kifayətlənib.

Xatırladaq ki, fevralın 28-də ABŞ və İsrailin İrana qarşı başlatdığı hücumlar və Tehranın buna regional cavab zərbələri endirməsi Hörmüz boğazının bağlanma təhlükəsini yaradıb. Bu toqquşmalarda İranın ali lideri Ayətullah Əli Xameneyi də daxil olmaqla bir çox yüksək rütbəli rəsmi həlak olub, ümumilikdə 1300-dən çox insan dünyasını dəyişib. Çin rəsmiləri regional xaosun qlobal iqtisadi artıma daha böyük zərbə vurmasının qarşısını almaq üçün diplomatik həll yoluna üstünlük verdiklərini vurğulayırlar.