BAKI, VOA, Nailə Babazadə

İspaniya hökuməti ABŞ və İsrailin İrana qarşı hərbi əməliyyatları nəticəsində Yaxın Şərq və Körfəz regionunda yaranan qeyri-sabitlik səbəbindən təxliyə edilən İspaniya vətəndaşlarının sayının 7 minə çatdığını açıqlayıb.

VOA xəbər verir ki, İspaniya Xarici İşlər Nazirliyinin yaydığı bəyanatda fevralın 28-dən başlayan gərginliklər zamanı heç bir İspaniya vətəndaşının xəsarət almadığı bildirilir. Məlumatda qeyd olunur ki, təxliyə prosesi digər ölkələrdə davam etsə də, təhlükəsizlik mülahizələrinə görə İrandan vətəndaşların çıxarılması əməliyyatları martın 7-də rəsmən başa çatdırılıb.

Təxliyə əməliyyatlarının coğrafiyası olduqca genişdir; nazirliyin hesabatına görə, indiyədək İrandan Bakıya, Qüdsdən İordaniyaya, Təl-Əvivdən Qahirəyə, habelə Bəhreyn və Küveytdən Ər-Riyada doğru cəmi doqquz quru təxliyə marşrutu təşkil edilib. Bundan əlavə, Omanın paytaxtı Maskatdan İspaniya Müdafiə Nazirliyinə məxsus təyyarələrlə üç hava təxliyəsi həyata keçirilib. Hazırda regiondakı bir çox ölkənin hava məkanı qapalı və ya qismən açıq olduğu üçün təxliyə edilənlərin əksəriyyəti qonşu ölkələr vasitəsilə vətənlərinə göndərilir.

Yaranmış vəziyyətlə əlaqədar İspaniya Xarici İşlər Nazirliyi İsrail, Fələstin, İordaniya, Qətər, Livan, Küveyt, Bəhreyn, BƏƏ, Səudiyyə Ərəbistanı, Oman, Suriya və İraq üçün səyahət tövsiyələrini yeniləyib. Bu bölgələr "yüksək riskli" zona elan edilib və vətəndaşlara həmin ölkələrə səfər etməmək qəti şəkildə tövsiyə olunur. Xüsusilə İsrailə səyahətdən tamamilə yayınmaq barədə xəbərdarlıq edilib. Xarici işlər naziri Xose Manuel Albares bir müddət əvvəl bölgədə təxminən 30 min vətəndaşlarının olduğunu bildirmişdi ki, bu da təxliyə prosesinin hələ də kritik mərhələdə olduğunu göstərir.