BAKI,VOA, Fərid Mikayılov
Birləşmiş Millətlər Təşkilatının Təhlükəsizlik Şurası İranın Körfəz ölkələri və İordaniyaya qarşı hücumlarını kəskin şəkildə pisləyən qətnamə qəbul edib.
VOA xəbər verir ki, Təhlükəsizlik Şurasının 15 üzvündən 13-ü qətnamənin lehinə səs verib.
ABŞ, Fransa, Böyük Britaniya, Danimarka, Yunanıstan, Pakistan, Panama, Somali, Bəhreyn, Kolumbiya, Konqo Respublikası, Latviya və Liberiya sənədi dəstəkləyib. Çin və Rusiya isə səsvermədə bitərəf qalıb.
Qətnamə 135 BMT üzv dövləti tərəfindən dəstəklənib və sənəd Bəhreyn tərəfindən Körfəz Əməkdaşlıq Şurası ölkələri adından hazırlanıb.
Qətnamədə İranın Bəhreyn, Küveyt, Oman, Qətər, Səudiyyə Ərəbistanı, Birləşmiş Ərəb Əmirlikləri və İordaniyaya qarşı hücumları “ən sərt şəkildə” pislənib.
Sənəddə bu hücumların beynəlxalq hüququn pozulması olduğu və beynəlxalq sülh və təhlükəsizliyə ciddi təhdid yaratdığı vurğulanıb.
Qətnamədə həmçinin yaşayış məntəqələrinə və mülki obyektlərə edilən hücumlar qınanaraq zərər çəkən ölkələr və onların vətəndaşları ilə həmrəylik ifadə olunub.
Təhlükəsizlik Şurası İranı Körfəz ölkələri və İordaniyaya qarşı bütün hücumları dərhal dayandırmağa çağırıb.
Sənəddə İranın qonşu dövlətlərə qarşı təhdid və təxribatlardan, o cümlədən vasitəçi qüvvələrdən istifadə etmədən imtina etməsinin vacibliyi qeyd olunub.
Qətnamədə beynəlxalq ticarət gəmilərinin Hörmüz boğazı və Bab əl-Məndəb bölgəsində sərbəst naviqasiya hüququnun qorunmasının vacibliyi də vurğulanıb.
BMT Təhlükəsizlik Şurası həmçinin İranın bu strateji dəniz marşrutlarında hərəkət azadlığını məhdudlaşdırmağa yönəlmiş hər hansı addımının beynəlxalq sülh üçün ciddi təhlükə olduğunu bildirib.