BAKI, VOA, Nailə Babazadə

İsrail Baş naziri Benyamin Netanyahu, İranın müqavimətini qırdıqlarını iddia edərək hərbi əməliyyatların davam edəcəyinə dair siqnal verib.

VOA xəbər verir ki, İsrail Baş Nazirliyi Ofisinin yaydığı məlumata görə, Netanyahu Səhiyyə naziri Haim Katz ilə Milli Sağlamlıq Mərkəzinə ziyarəti zamanı etdiyi çıxışda məqsədlərinin İran xalqını "rejimdən xilas etmək" olduğunu irəli sürüb. O, "İndiyədək atdığımız addımlarla onların müqavimətini qırdığımız və hələ də aktiv olduğumuz şübhəsizdir" deyərək hücumların ardının gələcəyi mesajını verib. İsrailin beynəlxalq mövqeyində dəyişikliyə nail olduqlarını iddia edən Netanyahu, müdafiənin İrana qarşı hücumlardan daha önəmli olduğunu, bunun isə hər şeydən əvvəl xalqın iradəsi və yüksək inamı ilə bağlı olduğunu bildirib.

Xatırladaq ki, İsrail və ABŞ, Tehran və Vaşinqton rəhbərlikləri arasında danışıqlar davam etdiyi bir vaxtda, fevralın 28-də İrana qarşı hərbi hücumlara başlayıb. İran isə buna cavab olaraq həm İsraildəki, həm də ABŞ bazalarının yerləşdiyi Qətər, BƏƏ və Bəhreyn başda olmaqla bölgə ölkələrindəki müəyyən hədəflərə zərbələr endirib. ABŞ və İsrailin birgə hücumları nəticəsində İranın ali lideri Ayətullah Əli Xamenei ilə yanaşı, bir çox yüksək rütbəli rəsmi həlak olub. İran rəsmilərinin verdiyi məlumata görə, bu hücumlar zamanı ümumilikdə 1332 nəfər həyatını itirib.