BAKI, VOA, Nailə Babazadə

Amerika Birləşmiş Ştatları, Əfqanıstan rəhbərliyini "fidyə tələb etmək və ya siyasi güzəştlər əldə etmək məqsədilə fərdləri qaçıraraq terror taktikalarından istifadə etdiyi" gerekçəsilə rəsmi olaraq "haqsız saxlamaları dəstəkləyən dövlət" siyahısına daxil edib.

VOA xəbər verir ki, ABŞ Dövlət Katibi Marko Rubio məsələ ilə bağlı verdiyi bəyanatda Əfqanıstanın hələ də ABŞ və digər xarici ölkə vətəndaşlarını əsassız yerə həbs etməyə davam etdiyini bildirib. Rubio qeyd edib ki, bu cür qanunsuz fəaliyyətlər səbəbindən Amerikalıların Əfqanıstana səyahət etməsi hazırda böyük risk daşıyır.

Dövlət Katibi Taliban rəhbərliyinə çağırış edərək, qanunsuz şəkildə saxlanılan şəxslərin dərhal azad edilməsini tələb edib.

"Taliban Dennis Koyl, Mahmud Həbibi və Əfqanıstanda haqsız yerə saxlanılan bütün Amerikalıları dərhal sərbəst buraxmalı və girov diplomatisiyası təcrübəsini birdəfəlik dayandırmalıdır." - deyə Rubio qeyd edib.

Bu termin ABŞ hökuməti tərəfindən bəzi ölkələrin xarici vətəndaşları siyasi təzyiq, fidyə və ya diplomatik bazarlıq vasitəsi kimi özbaşına (keyfi) şəkildə həbs etdiyi halları təsvir etmək üçün istifadə olunur. Vaşinqton bu cür addımları beynəlxalq hüquqa zidd hesab edərək "girov diplomatiyası" kimi xarakterizə edir.