BAKI, VOA, Nailə Babazadə

Pakistanın Bəlucistan vilayətində yerləşən Pəncqur bölgəsində baş verən iki ayrı hadisə nəticəsində 8 nəfər həyatını itirib.

VOA xəbər verir ki, motosikletli silahlı şəxslər yoldan keçən iki avtomobili hədəf alaraq onlara atəş açıblar. Avtomobildə olanların cavab atəşi verməsi ilə tərəflər arasında qısamüddətli və şiddətli atışma baş verib. Çatışma başa çatdıqdan sonra nəqliyyat vasitələrindəki 6 nəfərin öldüyü müəyyən edilib. Hücum edən şəxslər hər iki avtomobili yandırdıqdan sonra hadisə yerindən qaçmağa nail olublar.

Eyni bölgənin İran sərhədinə yaxın hissəsində isə digər bir faciəvi hadisə qeydə alınıb. Təhlükəsizlik qüvvələri ərazidə şübhəli hərəkət edən iki avtomobilə "saxla" əmri verib. Sürücülərdən birinin xəbərdarlığa məhəl qoymayaraq qaçmağa cəhd göstərməsi üzərinə polis və hərbi birləşmələr atəş açıblar. Hadisə nəticəsində avtomobildə olan əfqan mənşəli 2 qadın həyatını itirib. Pakistan rəsmiləri bu şəxslərin ölkəyə qeyri-qanuni yollarla daxil olan əfqan miqrantlar olduğunu bildiriblər.

Qeyd edək ki, Pakistanda bu növ silahlı hücumlar əsasən Əfqanıstanla sərhəd olan Xeybər-Paxtunxva və Bəlucistan vilayətlərində cəmləşib. Bu ərazilərdə puştun və bəluc etnik qruplarının haqlarını müdafiə etdiyini iddia edən TTP (Pakistan Talibanı) və BLA (Bəlucistan Azadlıq Ordusu) kimi silahlı qruplaşmalar həm təhlükəsizlik qüvvələrinə, həm də mülki əhaliyə qarşı mütəmadi olaraq hücumlar həyata keçirirlər. İslamabad rəhbərliyi bu hücumların bir çoxunun Əfqanıstan ərazisindən idarə olunduğunu vurğulasa da, Kabil tərəfi bu iddiaları qəti şəkildə rədd edir.