BAKI, AzerVoice, Nailə Babazadə
Fransa hökuməti Dassault Aviation tərəfindən istehsal olunan Rafale döyüş təyyarələrinin sayını əhəmiyyətli dərəcədə artırmaq niyyətindədir.
AzerVoice xəbər verir ki,ölkənin 2026-cı il dövlət büdcəsi layihəsində Müdafiə Nazirliyinin hazırkı 225 ədədlik hədəfi 286 təyyarəyə qədər yüksəltməyi nəzərdən keçirdiyi qeyd olunub.
Rəsmi sənədlərdə bildirilir ki, “proqramın məqsədi Hərbi Proqramlaşdırma Qanunu (LPM) çərçivəsində planlaşdırılan qüvvə strukturu ilə uyğun şəkildə tənzimlənə bilər”. Bu ifadə Parisin gələcəkdə daha çox Rafale sifarişinə açıq olduğunu göstərir.
Son illərdə Avropanın təhlükəsizlik mühitində baş verən dəyişikliklər Fransanı müdafiə xərclərini artırmağa sövq edib. Prezident Emmanuel Makron ilin əvvəlində çıxış edərək bildirmişdi ki, “Dünya indi heç vaxt olmadığı qədər təhlükəli və qeyri-müəyyəndir,”və buna görə də müdafiə büdcəsinə əlavə vəsait ayrılacağını elan etmişdi.
Ekspertlərin fikrincə, Rafale təyyarələrinin sayının artırılması həm Fransanın milli təhlükəsizlik imkanlarını gücləndirmək, həm də Avropa müdafiə sənayesini dəstəkləmək məqsədi daşıyır.
2019–2025-ci illəri əhatə edən əvvəlki Hərbi Proqramlaşdırma Qanunu çərçivəsində Fransa Hərbi Hava və Kosmik Qüvvələri üçün 185, Dəniz Qüvvələri üçün isə 40 Rafale təyyarəsi olmaqla ümumilikdə 225 ədəd təyyarə planlaşdırmışdı.
Yeni plana əsasən, bu say 2035-ci ilə qədər 286 təyyarəyə çatdırıla bilər. Artımın əsas məqsədi həm köhnəlmiş aviasiya parkının yenilənməsi, həm də ihracat müqavilələri səbəbilə azalan ehtiyatların bərpasıdır.
Bundan əlavə, 2024-cü ildə baş vermiş aviasiya qəzasının ardından iki əlavə Rafale təyyarəsinin 2026-cı ildə sifariş olunması planlaşdırılır.