BAKI, AzerVoice

ABŞ Dövlət Departamentində kütləvi ixtisarlar başlayır.

AzerVoice xəbər verir ki, ABŞ prezidenti Donald Trampın federal hökuməti kiçiltmə siyasətinə uyğun olaraq Dövlət Departamentində yaxın günlərdə genişmiqyaslı ixtisarların həyata keçiriləcəyi bildirilir.

“Washington Post”un əldə etdiyi Dövlət Departamentinin daxili memorandumunda işçilərə tezliklə e-poçt vasitəsilə işdən çıxarılma bildirişlərinin göndəriləcəyi qeyd olunub.

Sənəddə ixtisar olunacaq əməkdaşların sayı açıqlanmasa da, vəzifələrini itirəcək şəxslərə dəstək göstəriləcəyi qeyd edilib. ABŞ Dövlət Departamentinin sözçüsü Tammi Bryus planın Dövlət katibi Marko Rubio tərəfindən təsdiqləndiyini və icra mərhələsinə keçdiyini açıqlayıb.

Qeyd edək ki, iyunun əvvəlində Kaliforniya ştatında federal hakimlik Dövlət Departamentində təxminən 2000 nəfərin ixtisar edilməsinə dair planı müvəqqəti dayandırmışdı. Lakin sonradan Ali Məhkəmə bu qərarı ləğv edərək Trampın planının qarşısını açdı.

Donald Tramp vəzifəyə gəldikdən sonra federal hökumətin strukturunda ciddi dəyişikliklər həyata keçirərək Kənd Təsərrüfatı, Energetika, Əmək, Daxili İşlər, Dövlət, Xəzinədarlıq və Veteranların İşləri kimi mühüm departamentlərdə minlərlə vəzifəni ixtisar edib. Proses həmçinin Milli Elm Fondu, Kiçik Biznes Assosiasiyası və Ətraf Mühitin Mühafizəsi Agentliyinə də təsir göstərib. Bu ixtisarlar həmkarlar ittifaqları və bir çox təşkilatlar tərəfindən məhkəməyə daşınıb və ölkə daxilində narazılıqlara səbəb olub.