BAKI,AzerVoice
İspaniya milli komandasının kapitanı və Qalatasarayın hücumçusu Alvaro Morata və ailəsini ölüm təhdidi ilə hədələyən 19 yaşlı ispan gənc polis tərəfindən həbs edilib.
AzerVoice xəbər verir ki, hadisə UEFA Millətlər Liqasının final mərhələsində baş verib.
8 iyun tarixində Almaniyada keçirilən Portuqaliya–İspaniya oyununda Morata penaltı zərbəsini boşa verdikdən sonra, sosial şəbəkələrdə ona və ailəsinə qarşı təhdid dolu mesajlar yayılıb.
Moratanın ailəsinin polisə müraciətindən sonra araşdırmaya başlayan hüquq-mühafizə orqanları sözügedən mesajı yazan şəxsi müəyyənləşdirib və onu İspaniyanın Malaqa şəhərində keçirdiyi əməliyyatla saxlayıb.
Malaqa polisi tərəfindən verilən məlumata görə, şübhəli şəxs hədələyici mesajların yayımlanmasından iki gün sonra polis bölməsinə gələrək, sosial media hesabının oğurlandığını iddia edib. Lakin aparılan istintaq nəticəsində bunun yalan olduğu ortaya çıxıb və həmin şəxs dərhal həbs olunub.
Hazırda məsələ ilə bağlı istintaq davam etdirilir.