BAKI, AzerVoice
Tesla və BYD-yə rəqib olaraq, CATL-in 5 dəqiqəyə 500 km məsafə qət edən yeni “Shenxing” akkumulyatoru təqdim olunub.
AzerVoice xəbər verir ki, dünyanın ən
böyük elektrik avtomobil akkumulyatoru istehsalçısı olan Çin
şirkəti CATL, yeni nəsil “Shenxing” adlı super şarj texnologiyasını
təqdim edib.
Şirkət bildirir ki, bu akkumulyator cəmi 5 dəqiqəlik şarjla 500
kilometrə qədər məsafə qət etmək gücünə malikdir.
Yeni texnologiya Tesla və BYD kimi nəhəng rəqiblərlə rəqabəti daha da artırır. Müqayisə üçün, Tesla-nın Supercharger sistemi eyni məsafəni 15 dəqiqəyə təmin edə bilir, BYD isə 5 dəqiqədə 400 km-ə yaxın məsafə vəd edir.
CATL-in Texnologiya Direktoru Qao Huan “Texnologiya Günü” tədbirində çıxışı zamanı qeyd edib ki, məqsəd “Shenxing” batareyasını elektrikli avtomobillər üçün yeni standart səviyyəsinə gətirməkdir. Tam şarjla 800 kilometr məsafə təmin edən bu batareya -10°C kimi aşağı temperaturda belə 15 dəqiqədə 80%-lik şarj səviyyəsinə çata bilir.
Qeyd edək ki, şirkət tədbir zamanı litium və qurğuşun-turşu batareyalarına alternativ kimi təqdim edilən “Naxtra” adlı yeni nəsil natrium-ion texnologiyasını da elan edib. Təhlükəsizliyi və aşağı istehsal xərcləri ilə seçilən bu batareyanın da diapazonu 500 kilometrdir və ilin sonuna qədər kütləvi istehsalına başlanacağı gözlənilir.
CATL hal-hazırda Tesla, BMW, Volkswagen və Ford kimi nəhənglərə akkumulyator təchizatı ilə məşğuldur və 2024-cü ildə 38%-lik bazar payı ilə sektorda liderliyini qoruyub. Onun ən yaxın rəqibi BYD isə 17,2%-lik payla ikinci yerdədir.
ABŞ-ın keçmiş administrasiyası dövründə tətbiq edilən tariflərin isə CATL-in fəaliyyətinə məhdud təsir göstərdiyi bildirilib. Şirkət, ABŞ bazarına alternativ yanaşmalar üzərində işlədiyini və müştərilərlə dialoqda olduğunu açıqlayıb.