Bakı, AzerVoice

ABŞ Aeronavtika və Kosmik Tədqiqatlar İdarəsi (NASA) 2032-ci ildə Yerlə toqquşma ehtimalı olan “2024 YR4” asteroidinə dair yeni açıqlama yayıb.

AzerVoice xəbər verir ki , son hesablamalara əsasən, asteroidin Yerlə toqquşma ehtimalı 3,1 faizdən 0,004 faizə düşüb.

Fevralın 19-da NASA-nın rəsmi saytında yayımlanan məlumatda asteroidin gələcək orbitinin daha dəqiq müəyyən edildiyi və Yerlə toqquşma ehtimalının azaldığı bildirilib.

Nəhəng asteroidin Yerlə toqquşma ehtimalı var

NASA-nın açıqlamasına görə, son müşahidələr “2024 YR4”ün gələcək trayektoriyasındakı qeyri-müəyyənliyi daha da azaldıb. Hazırda Yer, asteroidin 2032-ci ildə vura biləcəyi ehtimal olunan yerlər siyahısında daha aşağı mövqedədir.

Bununla yanaşı, asteroidin Aya toqquşma ehtimalının 1,7 faiz olduğu qeyd edilir.

2024 YR4 asteroidi Ay ilə toqquşa bilər

Qeyd edək ki, asteroid ilk dəfə 27 dekabr 2024-cü ildə Çilidəki Rio Hurtado teleskopu tərəfindən aşkar edilib. İlkin hesablamalara görə, asteroidin Yerlə toqquşma ehtimalı 1,33 faiz idi, daha sonra bu göstərici 2 faizə, daha sonra isə 3,1 faizə qədər yüksəlib.

Son müşahidələr nəticəsində bu ehtimalın 0,004 faizə qədər endiyi təsdiqlənib.

Astronomların hesablamalarına görə, əgər “2024 YR4” Yerə çırpılarsa, böyük miqyaslı qlobal fəlakət yaratmayacaq, lakin təxminən 50 kilometr radiusunda ciddi dağıntılara səbəb ola bilər.

Asteroidin potensial təsir nöqtələri arasında Sakit Okeanın şərqi, Cənubi Amerikanın şimalı, Afrika və Cənubi Asiya bölgələri yer alır.