BAKI,VOA Orxan Qədirzadə

Britaniya şahzadəsi Harri ilə evləndikdən sonra aktyorluq fəaliyyətindən uzaqlaşan Meqan Marklın yenidən ekranlara qayıtması gündəmə gəlib. Onun “The Gentlemen” serialının üçüncü mövsümündə rol ala biləcəyi bildirilir.

“CNN”ə danışan Meqan Markla yaxın mənbələrin sözlərinə görə, Sasseks hersoginyasının qarşıdakı dövrdə Londonda məskunlaşması onun aktyorluğa dönüş ehtimalını artırır. Qay Riçinin rejissoru olduğu serialın çəkilişlərinin Böyük Britaniyada aparılması da bu ehtimalı gücləndirir.

Lakin Meqan Marklın serialda iştirakı hələ rəsmi şəkildə təsdiqlənməyib.

Markl dünya üzrə əsasən “Suits” serialındakı Reyçel Zeyn obrazı ilə tanınıb. O, 2011-2018-ci illərdə serialın yeddi mövsümündə rol alıb və bu obraz onun aktyorluq karyerasının ən uğurlu mərhələsi hesab olunur.

Markl aktyorluqdan uzaqlaşdıqdan sonra da ekranlardan tamamilə çəkilməyib. O və şahzadə Harri “Netflix” ilə əməkdaşlıq çərçivəsində sənədli və əyləncə layihələri hazırlayıblar.

Bununla belə, Meqan Marklın aktyorluğa qayıdışı baş verərsə, bu, onun səkkiz illik fasilədən sonra böyük ekran və televiziya layihələrində yenidən görünməsi demək olacaq.