BAKI,VOA Orxan Qədirzadə

Çin Sahil Mühafizəsi Filippinə məxsus bir neçə gəmi ilə bağlı Cənubi Çin dənizində yerləşən mübahisəli Skarboro rifində (Scarborough Shoal) "nəzarət tədbirləri" həyata keçirdiyini bildirib.

Çin Sahil Mühafizəsinin açıqlamasına görə, Filippin gəmiləri sözügedən ərazinin sularında "qanunsuz fəaliyyət göstərib" və buna görə onlara qarşı müvafiq tədbirlər görülüb.

Gərginlik Filippinin Çin Sahil Mühafizəsi gəmisini Skarboro rifi yaxınlığında Filippin hökumətinə məxsus balıqçılıq gəmisinə su şırnağı ilə müdaxilə etməkdə ittiham etməsindən sonra artıb.

Filippin tərəfi bildirib ki, Çin gəmisinin su topundan açdığı atəş nəticəsində onların gəmisinə dolayı zərbə dəyib.

Skarboro rifi Cənubi Çin dənizində yerləşən və Çin, Filippin və digər regional ölkələr arasında suverenlik mübahisələrinin davam etdiyi strateji ərazilərdən biridir.

Bu ərazi həm balıqçılıq resursları, həm də mühüm dəniz yollarına yaxınlığı səbəbindən regional təhlükəsizlik baxımından böyük əhəmiyyət daşıyır.

Cənubi Çin dənizində Çin və Filippin arasında son illərdə xüsusilə mübahisəli adalar və dəniz sərhədləri məsələsi ilə bağlı qarşıdurmalar artıb.