BAKI,VOA, Fərid Mikayılov

Belarus Prezidenti Aleksandr Lukaşenko rusiyalı həmkarı Vladimir Putin ilə görüşmək məqsədilə Rusiyaya işgüzar səfərə yola düşüb.

VOA xəbər verir ki, iki ölkə lideri Belarus-Rusiya çoxtərəfli əməkdaşlıq formatının ən aktual məsələlərini, eləcə də regionda və dünyada cərəyan edən son hərbi-siyasi vəziyyəti geniş şəkildə müzakirə edəcəklər.

Bu qəfil səfər Ukrayna Prezidenti Volodimir Zelenskinin Belarusa qarşı irəli sürdüyü kəskin ultimatumdan bir neçə gün sonraya təsadüf edir.

Belə ki, iyunun 19-da Zelenski Minskdən sərhəd boyu yerləşdirildiyi iddia edilən və Rusiya qoşunlarının zərbələrini koordinasiya edən pilotsuz uçuş aparatlarının (PUA) retranslyator və siqnal gücləndirici texnikasını bir həftə ərzində geri çəkməyi və ya söndürməyi tələb edib, əks halda "Kiyevin bunu özünün edəcəyi" ilə hədələyib.

Belarus lideri Aleksandr Lukaşenko isə öz növbəsində ölkəsinin Ukrayna münaqişəsində hər hansı formada iştirak etmək niyyətində olmadığını və bunun üçün heç bir hərbi-mülki zərurətin yaranmadığını bir daha bəyan edib.