BAKI,VOA,Yusif Şərifzadə

ABŞ Prezidenti Donald Trampın administrasiyası Latın Amerikası ölkələrini yenilənmiş Monro Doktrinasını dəstəkləməyə çağırıb.

VOA xəbər verir ki, ABŞ Müdafiə Nazirliyinin siyasət məsələləri üzrə rəhbəri Elbric Kolbi bu barədə Perunun Kusko şəhərində keçirilən Amerika qitəsi müdafiə nazirlərinin konfransında çıxışı zamanı danışıb.

Kolbi bildirib ki, Vaşinqtonun yeni yanaşması ABŞ-nin müdafiə strategiyasını narkotik qaçaqmalçılığı, qanunsuz miqrasiya və daxili təhlükəsizlik məsələləri ilə daha sıx əlaqələndirməyi nəzərdə tutur. Onun sözlərinə görə, ABŞ hərbçiləri ötən ilin payızından narkotik daşıyan qayıqlara qarşı əməliyyatlar keçirir.

ABŞ Müdafiə Nazirliyi həmçinin Ekvadorda artıq həyata keçirilən model əsasında digər tərəfdaş ölkələrlə birgə narkotik qaçaqmalçılığına qarşı əməliyyatlar keçirməyi planlaşdırır.

Elbric Kolbi Monro Doktrinası ilə bağlı narahatlıqları qəbul etsə də, bu yanaşmanın təhrif olunmuş şəkildə təqdim edildiyini bildirib. O qeyd edib ki, yeni siyasətin məqsədi Latın Amerikası ölkələrinin təhlükəsizlik imkanlarını gücləndirmək və onların öz maraqlarını qorumasına dəstək verməkdir.