BAKI,VOA,Yusif Şərifzadə

NATO Zirvə Toplantısında ABŞ ilə Avropa ölkələri arasında müdafiə xərcləri və təhlükəsizlik siyasəti ilə bağlı fikir ayrılıqları əsas müzakirə mövzularından biri olaraq qalır.

VOA xəbər verir ki, siyasi təhlilçi Aleksandru Hudişteanu ABŞ Prezidenti Donald Trampın Avropa ölkələrini müdafiəyə daha çox vəsait ayırmağa qətiyyətlə təşviq etdiyini bildirib. Bununla yanaşı, NATO-nun baş katibi Mark Rütte vurğulayıb ki, Zirvə Toplantısında əsas məsələ müdafiəyə nə qədər vəsait ayrılması deyil, həmin vəsaitin necə və hansı istiqamətlərdə xərclənməsidir.

Aleksandru Hudişteanunun sözlərinə görə, Tramp Avropa ölkələrinə öz müdafiələrinə görə daha böyük məsuliyyət daşımalı olduqlarını xatırladır. Onun fikrincə, Vaşinqton Avropanın təhlükəsizliyə daha çox töhfə verməsini istəyir ki, ABŞ diqqətini digər strateji istiqamətlərə yönəldə bilsin.

Məlumata görə, Tramp İranla bağlı hərbi qarşıdurma zamanı Avropa müttəfiqlərinin kifayət qədər dəstək göstərmədiyini düşünərək onları tənqid edib. Lakin təhlilçi bu yanaşmanın düzgün olmadığını bildirib. O qeyd edib ki, NATO müdafiə xarakterli alyansdır və seçim əsasında başlanılan müharibələrdə iştirak etmək öhdəliyi daşımır.