BAKI,VOA,Yusif Şərifzadə

ABŞ Prezidenti Donald Tramp bildirib ki, ABŞ və İran nümayəndələri çərşənbə axşamı Qətərdə görüş keçirəcəklər. Onun sözlərinə görə, son hərbi gərginliyə baxmayaraq, diplomatik proses davam edir.

VOA xəbər verir ki, Donald Tramp bu barədə bazar ertəsi açıqlama verib. O bildirib ki, Qətərdə keçiriləcək görüş Vaşinqton və Tehran arasında dialoqun davam etdirilməsi istiqamətində növbəti addım olacaq.

Trampın açıqlaması İran rəsmisinin texniki danışıqların bu həftə keçirilməsinin planlaşdırılmadığını bildirməsindən təxminən iki saat sonra səsləndirilib.

İranın xarici işlər nazirinin müavini Kazım Qəribabadi Vaşinqton və Tehran arasında imzalanmış anlaşma memorandumu ilə bağlı texniki məsləhətləşmələrin hələlik gündəmdə olmadığını deyib.

O bildirib ki, növbəti görüş yalnız zəruri şərtlər formalaşdıqdan sonra keçiriləcək. İran rəsmisi həmin şərtlərin nədən ibarət olduğunu açıqlamayıb.

Bununla yanaşı, Donald Trampın bəyanatı tərəflər arasında diplomatik təmasların tam dayanmadığını göstərən növbəti siqnal kimi qiymətləndirilir.