BAKI,VOA,Yusif Şərifzadə

Pakistanın daxili işlər naziri Möhsin Nəqvi İrana səfər edib və onun yüksək səviyyəli İran rəsmiləri, o cümlədən xarici işlər naziri Abbas Əraqçi ilə görüşəcəyi gözlənilir.

VOA xəbər verir ki, Abbas Əraqçinin İsveçrədə keçirilməsi planlaşdırılan danışıqlarda iştirak edəcəyi gözlənilsə də, İran nümayəndə heyətinin hazırda orada olmadığı məlum olub.

Müşahidəçilərin fikrincə, Möhsin Nəqvinin Tehrana növbəti səfəri təsadüfi deyil. Bildirilir ki, danışıqlarda çətinlik yarandığı dövrlərdə o, bir neçə dəfə İran paytaxtına səfər edib və bundan sonra diplomatik prosesdə irəliləyişlər müşahidə olunub.

Hazırkı səfərin nəticələrinin necə olacağı bəlli olmasa da, Nəqvinin danışıqlarda mühüm fiqurlardan biri olduğu vurğulanır.

Məlumata görə, o, Pakistan hökuməti və Baş nazir Şahbaz Şərif tərəfindən tam səlahiyyətləndirilib. Eyni zamanda Pakistanın Silahlı Qüvvələrinin rəhbəri Asim Münirlə yaxın əlaqələrə malik olması onun rolunu daha da artırır.

Ekspertlər hesab edirlər ki, Nəqvinin Tehrana səfəri iki məqama işarə edir: birincisi, proses tərəflərin istədiyi sürətlə irəliləmir, ikincisi isə danışıqların davamı üçün Pakistanın vasitəçiliyinə ehtiyac yaranıb.