BAKI,VOA,Yusif Şərifzadə

ABŞ müdafiə naziri Pit Heqset ölkəsinin hərbi sursat ehtiyatlarında çatışmazlıq yaşanması ilə bağlı iddiaları rədd edib.

VOA xəbər verir ki, nazir televiziya kanalına müsahibəsində ABŞ ordusunun sursat ehtiyatlarının vəziyyəti ilə bağlı yayılan məlumatların həqiqəti əks etdirmədiyini bildirib.

Son aylarda İran ətrafında yaranmış gərginliyin ABŞ-nin silah və sursat ehtiyatlarına təsir göstərdiyi barədə müzakirələr genişlənib. Xüsusilə ötən ay ABŞ Hərbi Dəniz Qüvvələrinin müvəqqəti rəhbəri Hunq Kao İranla bağlı vəziyyəti Tayvana silah satışının dayandırılmasının səbəblərindən biri kimi göstərmişdi.

Pit Heqset isə sursat ehtiyatlarında böhran yaşandığı barədə iddiaları qətiyyətlə rədd edib. Onun sözlərinə görə, bu məsələ bəzi media qurumları tərəfindən süni şəkildə şişirdilir.

Nazir vurğulayıb ki, ABŞ-nin hərbi ehtiyatları yüksək səviyyədədir və onların gücləndirilməsi istiqamətində işlər davam etdirilir.

"Heç bir problem yoxdur. Ehtiyatlarımız güclüdür və getdikcə daha da artır", – deyə Heqset bildirib.

O əlavə edib ki, ABŞ müdafiə sənayesi əvvəlki dövrlərlə müqayisədə daha çox sursat istehsal edir və istehsal həcmləri artmaqda davam edir.