BAKI,VOA,Yusif Şərifzadə

ABŞ Prezidenti Donald Trampın İranla bağlı davam edən sülh danışıqları fonunda yüksək vəzifəli rəsmilərlə görüş keçirəcəyi gözlənilir.

VOA xəbər verir ki, Ağ Evdə yerli vaxtla saat 11:00-da keçiriləcək kabinet səviyyəli görüşdə Trampın yaxın müşavirləri ilə İran məsələsini və danışıqların hazırkı vəziyyətini müzakirə edəcəyi bildirilir.

Məlumata görə, Tramp bir neçə gün əvvəl mümkün razılaşmanın artıq böyük ölçüdə hazırlandığını bəyan edib.

Bildirilir ki, Vaşinqton administrasiyası Hörmüz boğazında dəniz hərəkətinin bərpası və İranın nüvə imkanlarının məhdudlaşdırılması ilə bağlı siyasi çərçivəyə yaxınlaşdığına dair müsbət qiymətləndirmələr aparır.

Müşahidəçilərin fikrincə, belə bir razılaşma Trampa münaqişənin həlli istiqamətində nəticə əldə etdiyini bəyan etmək üçün siyasi imkan yarada bilər.

Bununla yanaşı, bəzi siyasi dairələrdə mümkün razılaşma ilə bağlı narazılıqların olduğu da bildirilir. Tənqidçilər hesab edirlər ki, əsas məsələlərin bir hissəsinin gələcək mərhələlərə saxlanılması əlavə müzakirələrə səbəb ola bilər.

Məlumatlara görə, proses ABŞ-da keçiriləcək aralıq seçkilər fonunda da diqqətlə izlənilir. Respublikaçı dairələrdə iqtisadi vəziyyət, qiymət artımı və yanacaq xərclərinin seçici davranışına mümkün təsiri ilə bağlı narahatlıqların olduğu qeyd edilir.