BAKI,VOA, Fərid Mikayılov

Helen McEntee Almaniya kansleri Fridrix Merts tərəfindən Ukrayna üçün təklif edilən “ortaq üzvlük” modelinin müəyyən risklər yarada biləcəyi ilə bağlı xəbərdarlıq edib.

VOA xəbər verir ki, İrlandiya xarici işlər nazirinin sözlərinə görə, belə bir model Ukraynanın tamhüquqlu üzvlük prosesini zəiflədə və ölkəni qeyri-müəyyən vəziyyətdə saxlaya bilər.

McEntee bildirib ki, Avropa İttifaqına üzvlük məsələsində bütün namizəd ölkələrə eyni prinsiplərlə yanaşılmalı və iki mərhələli sistem formalaşdırılmamalıdır.

Müzakirələrin mərkəzində Almaniyanın Ukraynaya qərar qəbuletmə mexanizmlərində müəyyən iştirak imkanları verən, lakin tam üzvlük statusu təqdim etməyən yeni model təklifi dayanır. Məlumata görə, bu yanaşma Ukraynanın bəzi proqramlardan mərhələli şəkildə yararlanmasını nəzərdə tutur.

Digər tərəfdən, Andriy Sibiha ölkəsinin əsas məqsədinin tamhüquqlu Avropa İttifaqı üzvlüyü olaraq qaldığını vurğulayıb.

Ukraynanın Aİ-yə inteqrasiyası ilə bağlı müzakirələrin yaxın aylarda daha da intensivləşəcəyi gözlənilir.