BAKI,VOA Orxan Qədirzadə

ABŞ prezidenti Donald Tramp sosial media platformasında Venesuelanı ABŞ-nin “51-ci ştatı” kimi təqdim edən xəritə paylaşaraq yenidən müzakirələrə səbəb olub.

VOA xəbər verir ki, paylaşılan xəritədə Venesuela ərazisinin üzərində kiçik ABŞ bayrağı yerləşdirilib və “51-ci ştat” ifadəsi yazılıb. Trampın paylaşımı beynəlxalq mediada geniş rezonans doğurub.

Bu paylaşım Venesuelanın müvəqqəti prezidenti Delsi Rodrigesin ölkəsinin heç vaxt ABŞ ştatına çevrilmək istəmədiyini bəyan etməsindən bir gün sonra edilib.

Rodriges çıxışında bildirib ki, Venesuela xalqı öz müstəqillik yoluna və azadlıq simvollarına sadiqdir. O vurğulayıb ki, ölkəsi ABŞ ilə münasibətləri diplomatik əməkdaşlıq çərçivəsində inkişaf etdirməyə çalışır.

Məlumata görə, Venesuela ilə ABŞ arasında diplomatik münasibətlər mart ayında yenidən aktivləşdirilib. Əvvəllər keçmiş prezident Nicolas Maduro Vaşinqtonla əlaqələri yeddi il əvvəl dayandırmışdı.

Xatırladaq ki, Maduro bu ilin yanvar ayında ABŞ xüsusi təyinatlı qüvvələrinin həyata keçirdiyi əməliyyat zamanı saxlanılmışdı. Bundan sonra ölkədə rəhbərlik dəyişmişdi.

Delsi Rodriges açıqlamasını Haaqa şəhərində Beynəlxalq Ədalət Məhkəməsində keçirilən iclas zamanı verib. İclasda neftlə zəngin Esseykibo bölgəsi ilə bağlı Venesuela və Qayana arasında davam edən mübahisə müzakirə olunub.

Amerika mediasının məlumatına görə, Tramp daha əvvəl də Venesuelanın ABŞ ştatına çevrilməsi ehtimalı barədə açıqlamalar verib. O, televiziya müsahibəsində bu məsələyə “ciddi yanaşdığını” bildirib.