BAKI,VOA, Fərid Mikayılov

Belçikanın Baş nazir müavini və xarici işlər naziri Maksim Prevo Türkiyənin Avropa üçün həm iqtisadi, həm də təhlükəsizlik baxımından strateji və əvəzolunmaz tərəfdaş olduğunu bildirib.

VOA xəbər verir ki, o, Türkiyənin iştirakı olmadan Avropanın təhlükəsizlik sisteminin müzakirəsinin mümkün olmadığını vurğulayıb.

Prevo bu fikirləri 10–14 may tarixlərində Kraliça Mathilda rəhbərliyində Belçikadan Türkiyəyə həyata keçiriləcək genişmiqyaslı iqtisadi missiya öncəsi açıqlayıb. O qeyd edib ki, iki ölkə arasında tarixi əməkdaşlıq XIX əsrə dayanır və münasibətlər bu gün daha da dərinləşərək strateji səviyyəyə yüksəlib.

Nazirin sözlərinə görə, missiya çərçivəsində 200 şirkət və 400-dən çox nümayəndə Türkiyəyə səfər edəcək. Səfərdə hökumət rəsmiləri, universitet rəhbərləri, ticarət palataları və müxtəlif federasiyalar da iştirak edəcək.

Prevo bildirib ki, sosial təminat, nəqliyyat, liman idarəçiliyi, logistika, aviasiya və müdafiə kimi sahələrdə təxminən 40 əməkdaşlıq sazişinin imzalanması planlaşdırılır.

O həmçinin qeyd edib ki, Türkiyə son üç ildə Belçikanın Avropa İttifaqı xaricində beşinci ən böyük ixrac bazarıdır və bu, iqtisadi əlaqələrin əhəmiyyətini göstərir.

“Türkiyə bu gün hər zamankından daha strateji aktordur. Tədarük zəncirlərindən tutmuş Avropanın qlobal təhlükəsizlik arxitekturasına qədər bir çox məsələlər Türkiyə ilə birlikdə həll olunmalıdır. Türkiyə olmadan Avropanın təhlükəsizlik arxitekturasını təsəvvür etmək mümkün deyil”- deyə o bildirib.

Prevot əlavə edib ki, Türkiyə Ukrayna müharibəsi və Yaxın Şərqdəki proseslərdə mühüm diplomatik rol oynayır, eyni zamanda beynəlxalq hüquqa və qaydalara əsaslanan dünya nizamının vacibliyini vurğulayır.

Onun sözlərinə görə, Türkiyə NATO daxilində də xüsusi mövqeyə malikdir və alyansın cənub-şərq cinahının təhlükəsizliyində əsas rol oynayır.