BAKI, VOA

İranın Milli Təhlükəsizlik Ali Şurasının katibi Əli Laricani rəsmi bəyanatla çıxış edərək, ölkəsinin ABŞ-ın hava hücumlarına qarşı uzunmüddətli müqavimət göstərmək iqtidarında olduğunu bildirib.

VOA xəbər verir ki, bu açıqlama ABŞ ordusunun İran daxilində yüzlərlə strateji hədəfə zərbələr endirdiyi bir vaxtda verilib.

Pentaqonda keçirilən mətbuat konfransında ABŞ-ın Müdafiə naziri hərbi missiyanın prioritetlərini açıqlayıb. Nazir qeyd edib ki, əməliyyatın məqsədi İranda demokratiya qurmaq deyil, ölkənin hərbi infrastrukturunu, raket potensialını və hərbi dəniz donanmasını tamamilə sıradan çıxarmaqdır. Eyni zamanda, İranın nüvə silahına sahib olmaq imkanlarının tamamilə aradan qaldırılması əsas strateji hədəf kimi müəyyən edilib.

Prezident Donald Tramp isə bəyanatında həlak olan amerikalı əsgərlərin qisasının alınacağına dair vəd verib və İran xalqını mövcud hakimiyyətə qarşı üsyana çağırıb. ABŞ ordusu İslam İnqilabı Keşikçiləri Korpusunun (SEPAH) baş qərargahının məhv edildiyini elan edərək, qurumun qalan qüvvələrinə təslim olmaq və ya "qaçılmaz ölüm"lə üzləşmək barədə xəbərdarlıq edib. Öz növbəsində, Tehran tərəfi Ali Rəhbər Əli Xameneyinin öldürülməsinə cavab olaraq İsrail və Körfəz ölkələrinə raket zərbələri endirdiyini təsdiqləyib.