BAKI,AzerVoice,Fərid Mikayılov

ABŞ Nümayəndələr Palatası Suriyaya tətbiq edilən “Sezar Aktı” sanksiyalarının ləğvini nəzərdə tutan qanunvericilik təşəbbüsünü təsdiqləyib.

AzerVoice xəbər verir ki, sanksiyaların ləğvi maddəsi Milli Müdafiə Səlahiyyətləri Aktına (NDAA) daxil edilib və sənəd ilin sonunadək Senatın səsverməsinə çıxarılacaq.

Sənəd qəbul ediləcəyi təqdirdə, 2019-cu ildə qüvvəyə minmiş və Suriya hökumətini müharibə cinayətlərinə görə hədəfləyən “Sezar Aktı” rəsmi olaraq ləğv ediləcək. Qanun layihəsi Ağ Evə Suriyanın yeni hökumətinin terrorizmlə mübarizə tədbirləri və dini-etnik qrupların hüquqlarının qorunması ilə bağlı dövri hesabat təqdim edilməsini də öhdəlik kimi müəyyən edir.

Qeyd edək ki, Suriya prezidenti Bəşşar Əsəd 2024-cü ilin dekabrında üsyançılar tərəfindən devrilmiş və Rusiyaya qaçmışdı. Bunun ardınca ABŞ administrasiyası ölkəyə qarşı tətbiq etdiyi bir sıra iqtisadi məhdudiyyətləri yumşaltmış, yeni prezident Əhməd əş-Şəraa ilə yüksək səviyyəli təmaslara başlamışdı.

Bununla belə, “Sezar Aktı”nın tam ləğvi yalnız Konqresin səlahiyyətindədir. ABŞ Prezidenti Donald Tramp bu addımı dəstəkləyib və qanunvericiləri prosesə sürət verməyə çağırıb.

Suriya Mərkəzi Bankının rəhbəri Əbdülqadir Husrieh ABŞ sanksiyalarının yumşaldılmasını “möcüzə” adlandıraraq bildirib ki, iqtisadi sabitliyin təmin olunması üçün məhdudiyyətlərin tam aradan qaldırılması vacibdir.