BAKI, AzerVoice, Nailə Babazadə
Əfqanıstanın şərqində 2 mindən çox insanın həyatını itirdiyi zəlzələdən sonra eyni bölgədə 5,6 bal gücündə yeni bir zəlzələ baş verib.
AzerVoice xəbər verir ki, Əfqanıstanda baş verən üçüncü zəlzələdən sonra ölənlərin sayı 2 min 205-ə yüksəlib.
ABŞ Geoloji Araşdırmalar Mərkəzi (USGS) yerli vaxtla saat 20:30 radələrində baş verən 5,6 bal gücündəki zəlzələnin episentrinin Nəngərhar vilayətinin mərkəzi şəhəri Cəlalabadın 14 kilometr şərqində olduğunu açıqlayıb.
Dərinliyi 10 kilometr olaraq müəyyən edilən zəlzələnin törətdiyi dağıntılarla bağlı hələlik rəsmi açıqlama verilməyib.
Ölkənin şərqində, Pakistan sərhədində 31 avqust bazar gecəsi baş verən 6 bal gücündəki zəlzələdən ən çox Kunər vilayəti zərər çəkmişdi. Hadisə nəticəsində indiyədək 2 min 205 nəfərin həyatını itirdiyi, 3 min 640 nəfərin isə yaralandığı açıqlanıb.
USGS sentyabrın 2-də də Cəlalabad şəhərinin 34 kilometr şimal-şərqində 5,2 bal gücündə zəlzələ baş verdiyini bildirmişdi.