BAKI, AzerVoice, Nailə Babazadə

İsrail ordusunun səhər saatlarından bəri Qəzza Zolağının müxtəlif bölgələrinə təşkil etdiyi hücumlardan 13 Fələstinli, o cümlədən bir hamilə qadın və onun körpəsi həlak olub.

AzerVoice xəbər verir ki, xəstəxana mənbələri və şahidlərin verdiyi məlumata görə, İsrail ordusu Qəzza Zolağının şimalındakı Qəzza şəhərinin yanında, həmçinin şimal və cənub bölgələrində evləri, çadırləri və dinc sakinlərin toplandığı yerləri hədəf alıb.

İsrail ordusu Qəzza şəhərinin qərbindəki Sayadin limanı ətrafındakı bir mənzili vurub. Həmin hücumda bir hamilə qadın və onun bətnindəki körpəsi də daxil olmaqla 5 Fələstinli həyatını itirib.

Qəzza şəhərinin mərkəzində yerləşən Derec məhəlləsində, Fevahir küçəsi yaxınlığındakı bir evə helikopterlə edilən hücumda 3 Fələstinli ölüb.

İsrail əsgərləri Qəzza şəhərinin qərbində yerləşən Nasr məhəlləsində, Rantisi Xəstəxanası yaxınlığında zorla yerindən edilmiş Fələstinlilərin qaldığı çadırlara atəş açıb. Hücumda çox sayda insan yaralanıb, bəzilərinin vəziyyəti kritikdir.

Nasr məhəlləsində həmçinin İsrail döyüş təyyarələri bir mənzili hədəf alıb.

Qəzza şəhərinin şimal-qərbində, Şeyx Rıdvan məhəlləsinin şimal-şərq hissəsindəki bina və evlər partladılır.

İsrail ordusuna məxsus helikopterlər Şeyx Rıdvan bazarında zorla yerindən edilmiş insanlara aid çadırlar və stendləri vurub, hücumdan sonra bəzi ərazilərdə yanğın baş verib.

Qəzzanın cənubundakı Zeytun və Sabra məhəllələri də top atəşinə məruz qalıb.

İsrail ordusunun Qəzza Zolağının mərkəzində yerləşən Nusayrat Qaçqınlar Düşərgəsinə pilotsuz uçuş aparatı (PUA) ilə etdiyi hücumda 5 Fələstinli həlak olub.

Düşərgənin Sevaraha bölgəsinə edilən PUA hücumunda isə 5 nəfər yaralanıb.