BAKI, AzerVoice, Səməd Əyyubov
Almaniyanın Hamburq limanı yaxınlığındakı anbarlardan birində güclü yanğın baş verib.
AzerVoice xəbər verir ki, şahidlərin sözlərinə görə, Feddel rayonunda alov əvvəlcə bir avtomobili bürüyüb, daha sonra qaz balonlarına keçərək partlayışlara səbəb olub.
Partlayış nəticəsində balonların parçaları yaxınlıqdakı avtomagistralda hərəkətdə olan avtomobillərin üzərinə düşüb, xəsarət alanların olduğu bildirilib. Hadisədən sonra magistral yol nəqliyyatın hərəkəti üçün bağlanıb.
Şəhər sakinlərinə pəncərə və qapıları bağlı saxlamaq, havalandırma və kondisioner sistemlərini söndürmək tövsiyə olunub. Bundan əlavə, mərkəzi dəmir yolu vağzalı ilə Harburq rayonu arasındakı qatarların hərəkəti də dayandırılıb.
Qeyd edək ki, yanğınla bağlı ilk məlumat yerli vaxtla saat 15:31-də (Bakı vaxtı ilə 17:31-də) daxil olub.