BAKI, AzerVoice Nərmin Ağayeva

İspaniyada 1961-ci ildən bəri ən güclü istilik dalğası qeydə alınıb.

AzerVoice xəbər verir ki, İspaniya Meteorologiya İnstitutu (AEMET) 3–18 avqust tarixlərində müşahidə olunan isti dalğasının ölkə tarixində ən şiddətlisi olduğunu açıqlayıb.

Qeyd olunub ki, bu müddət ərzində temperatur normadan 4,6 dərəcə yüksək olub. Müqayisə üçün, 2022-ci ilin iyulunda müşahidə edilən əvvəlki rekord isti dalğasında temperatur normadan 4,5 dərəcə yuxarı qalxmışdı. AEMET həmçinin bildirib ki, davamlı yüksək temperatur insanların sağlamlığına ciddi təsir göstərib, meşə yanğınlarının güclənməsinə səbəb olub.

Statistikaya görə, 1975–1999-cu illərdə İspaniyada ümumilikdə 44 isti dalğası (212 gün) qeydə alınıbsa, 2000–2024-cü illərdə bu göstərici 90 isti dalğası (417 gün) təşkil edib. Son illərdə isti dalğalarının təsir etdiyi əyalətlərin sayı da 36-dan 44-ə yüksəlib.

Bu ilin avqustunda Badajoz və Kordoba kimi cənub şəhərlərində temperatur 44 dərəcəni keçib. İspaniyada avqust ayında baş verən yanğınlar nəticəsində 407 min hektardan çox meşə və kənd təsərrüfatı ərazisi məhv olub. Hazırda Qalisiya, Kastiliya və Leon bölgələrində 17 yerdə yanğın davam edir, Leon vilayətinin iki kəndində alov səbəbindən 300-dən çox sakin təxliyə olunub.

Qeyd edək ki, AEMET 2025-ci ilin avqustunda baş verən isti dalğasını 1961-ci ildən bəri ən şiddətli hadisə adlandırıb.