BAKI, AzerVoice

İsveçin Beynəlxalq İnkişaf və Xarici Ticarət naziri Benjamin Dousa, Qəzzaya humanitar yardımın qarşısının alınması səbəbilə İsrailin ifrat sağçı nazirlərinə qarşı sanksiyalar tətbiq edilməsinin zəruriliyini bildirib.

AzerVoice xəbər verir ki, bu barədə İsveçin Beynəlxalq İnkişaf və Xarici Ticarət naziri Benjamin Dousa Anadolu Agentliyinə verdiyi müsahibədə məlumat verib.

Nazir qeyd edib ki, Qəzzada yaşanan ağır humanitar böhran və yardımların qarşısının alınması Avropa İttifaqının (Aİ) daha sərt mövqe sərgiləməsini tələb edir.

“İsveç hökuməti İsrail hökumətinə daha çox təzyiq göstərməyi düşünür. İfrat sağçı nazirlərə qarşı sanksiyalar və İsraillə tərəfdaşlıq müqavilələrinin yenidən nəzərdən keçirilməsi bu addımlara daxildir,” – deyə Dousa qeyd edib.

O vurğulayıb ki, Aİ daxilində İsrailə təzyiq göstərmək istəyən ölkələrin sayı hələ az olsa da, maarifləndirmə və diplomatik səylərlə bu dəstəyin artırılması mümkündür. Dousa əlavə edib ki, İsveç hökuməti Qəzzaya göstərilən humanitar yardımları 400 milyon kron səviyyəsindən 800 milyon krona qədər artırıb.

Nazir həmçinin İsveç və Türkiyə arasında iqtisadi əlaqələrə də toxunub, Aİ ilə Türkiyə arasında imzalanmış ticarət müqaviləsinin əhəmiyyətini qeyd edib.

Qeyd edək ki, İsrailin 2023-cü il oktyabrın 7-dən bu yana Qəzzaya davam edən hücumları nəticəsində 60 mindən çox fələstinli həlak olub, yüz minlərlə insan yaralanıb. Son rəsmi məlumatlara görə, İsrailin son hücumları nəticəsində 8970 nəfər həyatını itirib, 34 mindən çox insan isə yaralanıb.