BAKI, AzerVoice

Avropa Komissiyasının rəhbəri Ursula fon der Lyayen Ukrayna prezidenti Volodimir Zelenskidən ölkənin iki əsas antikorrupsiya qurumu — NABU (Milli Antikorrupsiya Bürosu) və SAP-ın (Xüsusi Antikorrupsiya Prokurorluğu) müstəqilliyinin məhdudlaşdırılması ilə bağlı izahat tələb edib.

AzerVoice xəbər verir ki, bu barədə AFP agentliyi məlumat yayıb.

“Ursula fon der Leyen qanunvericiliyə edilən düzəlişlərin nəticələrindən dərin narahatlığını ifadə edib və Ukrayna hökumətindən bununla bağlı açıqlama istəyib” – deyə, Aİ nümayəndəsi Giyom Mersye bildirib.

Xatırladaq ki, ötən gün Ukrayna Ali Radası bu iki qurumun fəaliyyətini məhdudlaşdıran qanun layihəsini qəbul edib. Zelenski bu qanunu imzalayıb. Yeni qanuna əsasən, NABU və SAP artıq Baş Prokurorun qərarlarından asılı vəziyyətə düşür. Baş prokuror NABU-nun bütün istintaq işlərinə çıxış əldə edir, detektivlərə icrası məcburi göstərişlər verə və işlər üzrə istintaq səlahiyyətini dəyişə bilər.

NABU və SAP-a qarşı təzyiqlər bu qurumların bəzi əməkdaşlarına qarşı dövlətə xəyanət, Rusiya ilə əlaqələr və korrupsiya şübhələri ilə izah olunur.

NABU-nun müstəqilliyinin məhdudlaşdırılması Ukraynada etirazlara səbəb olub. Bir sıra böyük şəhərlərdə aksiyalar keçirilib. Kiyev meri Vitali Kliçko da etirazlara qoşulub və yeni qanunun müəlliflərini “Ukraynanı avtoritarizmə sürükləməkdə” ittiham edib.

"Financial Times" nəşrinin məlumatına görə, Fransa prezidenti Emmanuel Makron və Avropa Şurasının rəhbəri Antoniu Koşta Zelenski ilə əlaqə saxlayaraq onu bu qanuna dair qərarını yenidən nəzərdən keçirməyə çağırıblar.