BAKI,AzerVoice

ABŞ Prezidenti Donald Tramp, ölkəsinin Birləşmiş Millətlər Təşkilatının Təhsil, Elm və Mədəniyyət üzrə Təşkilatı – YUNESKO-dan çıxması barədə qərar verib.

AzerVoice xəbər verir ki, qərarın səbəbi kimi təşkilatın “anti-İsrail və anti-Amerika” yönlü fəaliyyəti göstərilir.

Ağ Evdən bildirilib ki, YUNESKO-nun müxtəliflik, bərabərlik və inklüzivlik siyasətləri, eləcə də qurumun “Fələstinyönlü və Çinmeylli qərəzləri” Vaşinqtonun narazılığına səbəb olub.

“Tramp, YUNESKO-nun mübahisəli, qarşıdurma doğuran mədəni və sosial təşəbbüsləri dəstəklədiyini, bunun isə ABŞ-ın seçdiyi siyasi kursla ziddiyyət təşkil etdiyini əsas götürərək təşkilatdan çıxmaq qərarına gəlib”- deyə Ağ Evdən bildirilib.

Tramp administrasiyası YUNESKO-nun dərc etdiyi “İrqçiliklə Mübarizə Alət Dəsti” sənədini və təşkilatın “2024-cü ildə kişilərin transformasiyası” təşəbbüsünü də tənqid edib. Hökumət nümayəndələri bu təşəbbüsləri “Amerika dəyərlərinə zidd və ideoloji yönümlü” adlandırıb.

Qeyd edək ki, ABŞ administrasiyası YUNESKO-dakı üzvlüyün yenidən qiymətləndirilməsi qərarını 2025-ci ilin fevralında açıqlamışdı. Həmin vaxt Vaşinqton təşkilatın ABŞ maraqlarına nə dərəcədə cavab verdiyini və mümkün antisemitizm hallarını araşdıracağını bildirmişdi.