BAKI, AzerVoice

ABŞ Dövlət Departamenti Suriyada davam edən silahlı toqquşmalar və artan təhlükəsizlik riskləri fonunda bu ölkəyə qarşı 4-cü səfər xəbərdarlığını qüvvədə saxladığını açıqlayıb.

AzerVoice-un məlumatına görə bildirilib ki, ABŞ vətəndaşları Suriyanı dərhal tərk etməli, çıxış imkanı olmayanlar isə təhlükəsiz sığınacaqlarda qalmalıdır.

Rəsmi bəyanatda Suriyada yaranmış vəziyyətin həyati təhlükə yaratdığı vurğulanır və bölgədə qalan şəxslərə ciddi xəbərdarlıq edilir.

Xəbərdarlıq, Suriyanın cənubunda yerləşən Süveyda vilayətində son günlərdə baş verən ağır toqquşmalar fonunda verilib. İyulun 13-dən başlayaraq Bədəvi ərəb qəbilələri ilə yerli Dürzi silahlı birləşmələri arasında silahlı qarşıdurmalar müşahidə olunur. Əraziyə göndərilən Suriya hökumət qüvvələri Dürzi qruplar tərəfindən hücuma məruz qalıb. Yerli mənbələr onlarla əsgərin həlak olduğunu bildirir.

Atəşkəs cəhdləri nəticə verməyib və gərginlik davam etdiyi bir vaxtda, İsrail Hərbi Hava Qüvvələri Suriyadakı hərbi hədəfləri vurmağa başlayıb. İyulun 16-da İsrail aviasiyası Dəməşqdə yerləşən Prezident Sarayı, Baş Qərargah binası və Müdafiə Nazirliyini hədəfə alan hava zərbələri endirib.

Eyni gündə Süveydada müvəqqəti atəşkəs razılaşması əldə olunsa da, bölgədə döyüşlər və İsrailin hava hücumları fasiləsiz şəkildə davam edib. Şam və Dəra vilayətlərində də İsrailin aviazərbələri qeydə alınıb.

Yerli mənbələrin məlumatına görə, həm yerli qarşıdurmalar, həm də İsrailin hava hücumları nəticəsində Süveyda və ətraf bölgələrdə yüzlərlə insanın həyatını itirdiyi ehtimal edilir.