BAKI, AzerVoice

Tramp və Netanyahu Qəzzadan “könüllü köç” planını müzakirə ediblər.

AzerVoice xəbər verir ki, İsrailin dövlət televiziyası KAN-ın məlumatına görə, ABŞ prezidenti Donald Tramp və İsrailin baş naziri Benyamin Netanyahu arasında keçirilən son görüşdə Qəzzada atəşkəs danışıqları ilə yanaşı, fələstinlilərin başqa ölkələrə “könüllü köç” adı altında sürgün edilməsi məsələsi də müzakirə olunub.

Yüksək səviyyəli siyasi mənbələrin verdiyi məlumata görə, Dohada davam edən atəşkəs danışıqları bir həftədən artıq çəkə bilər. Həmin mənbələr qeyd edir ki, hazırda masada olan atəşkəs təklifi İsrailin şərtlərinin 80-90 faizinə cavab verir.

Mənbələrdən biri Trampın Qəzzadan fələstinlilərin çıxarılması planına dəstəyinin İsraildə müsbət qarşılandığını və müstəqil Fələstin dövlətinin qurulmasının bu prosesdə gündəmdə olmadığını bildirib.

ABŞ prezidenti Tramp, Qəzzada 60 günlük atəşkəs üçün İsrailin lazım olan şərtləri qəbul etdiyini bəyan edib. Danışıqlarda vasitəçi kimi çıxış edən Qətər və Misir tərəflərinin HƏMAS-a “son təklif”i təqdim edəcəyi bildirilib.

HƏMAS isə İsraillə atəşkəs və məhbus mübadiləsi ilə bağlı təklifə müsbət cavab verdiyini və danışıqlara hazır olduğunu açıqlayıb. Bununla belə, Təl-Əviv administrasiyası Qətərin atəşkəs təklifində etdiyi dəyişiklikləri qəbul etmədiyini bildirib, lakin İsrail nümayəndə heyəti danışıqlar üçün Dohaya gedib.

Qeyd edək ki, İsrailin Qəzzada HƏMAS-ın hakim olmadığı, silahların yerə qoyulduğu və liderlərinin sürgün edildiyi yeni idarəetmə quruluşu yaratmağa çalışdığı barədə məlumatlar yayılıb. ABŞ-ın Yaxın Şərq üzrə xüsusi nümayəndəsi Stiv Vitkoffun planına əsasən, ilkin mərhələdə İsrailin 10 əsiri azad etməsi nəzərdə tutulur. Atəşkəsin davamı isə bölgədəki siyasi və hərbi vəziyyətdən asılı olacaq.