BAKI, AzerVoice

Fransa İranın iki vətəndaşını Mossad casusluğu ittihamı ilə həbs etməsinə sərt reaksiya verib.

AzerVoice xəbər verir ki, Fransanın xarici işlər naziri Jan-Noel Barrot İranın Sesil Kohler və Jak Paris adlı Fransa vətəndaşlarını Mossad üçün casusluqda ittiham edərək həbs etməsinə münasibət bildirib.

Nazir bu ittihamların sübut olunacağı təqdirdə belə, onları “tamamilə əsassız və haqsız” sayacaqlarını vurğulayıb.

Barrot açıqlamasında İran hakimiyyətindən bu şəxslərlə bağlı hələ də rəsmi məlumat alınmadığını deyib və onların dərhal və qeyd-şərtsiz azad olunmasına çağırıb. O, həmçinin bu prosesdə Fransa hökumətinin saxlanılan şəxslərin və ailələrinin yanında olmağa davam edəcəyini bildirib.

Qeyd edək ki, Fransa vətəndaşları Sesil Kohler və Jak Paris 2022-ci ilin may ayında İranda casusluq ittihamı ilə həbs olunublar. İran dövlət televiziyası həmin ilin oktyabr ayında onların guya Fransanın xarici kəşfiyyat orqanı DGSE üçün çalışdıqlarını və ölkədə rejim dəyişikliyinə zəmin yaratmaq məqsədi ilə hərəkət etdiklərini etiraf etdikləri görüntüləri yayımlayıb.

Fransa tərəfi bu “etirafların” təzyiq altında çəkildiyini və real faktlara əsaslanmadığını bildirir. Fransız mətbuatı isə onların "Mossad adından casusluq", "rejimi devirmək məqsədilə sui-qəsd" və "yer üzündə korrupsiyaya səbəb olmaq" kimi ağır ittihamlarla üzləşdiklərini yazır.