BAKI, AzerVoice

İsrail atəşkəsə baxmayaraq hücumlarını səhər saat 09:00-a qədər davam etdirib.

AzerVoice xəbər verir ki, İran atəşkəsin qüvvəyə minməsinə baxmayaraq, İsrailin üç mərhələdə hücumlar həyata keçirdiyini və bu hücumların səhər saat 09:00-a qədər davam etdiyini bildirib.

İranın dövlət televiziyasının yaydığı məlumata görə, Hatəmül-Ənbiya Mərkəzi Qərargahının sözçüsü İbrahim Zülfiqari bəyan edib ki, “Sionist təcavüzkar rejim bu gün səhər saat 09:00-a qədər İran ərazisində bəzi mərkəzləri üç mərhələdə hədəf alıb”.

Zülfiqari əlavə edib ki, İran Silahlı Qüvvələri öncədən İsrailin hər hansı təcavüzünə cavab verəcəyini və bunun ağır nəticələri olacağını bəyan etmişdi.

Qeyd olunur ki, ABŞ prezidenti Donald Tramp gecə saatlarında İsrail və İran arasında atəşkəsin əldə olunduğunu elan etmiş, İsrail tərəfi isə bu atəşkəsi qəbul etdiyini açıqlamışdı. Atəşkəsin səhər saat 07:00-da qüvvəyə minməsi nəzərdə tutulurdu.

Bununla belə, İsrail hücumların davam etdiyini, hətta atəşkəsdən sonra İran tərəfindən raketlər buraxıldığını iddia edib. İsrailin müdafiə naziri də bu səbəblə İrana qarşı cavab hücumu əmr etdiyini bildirib.

İran Baş Qərargahı isə İsrailin bu iddiasını rədd edərək, raketlərin İrandan atılmadığını bəyan edib.