BAKI, AzerVoice

ABŞ və İran arasında danışıqların aparılması üçün hələki gec deyil.

AzerVoice xəbər verir ki, bu barədə ABŞ prezidenti Donald Tramp Ağ Evdə jurnalistlərin suallarını cavablandırarkən bildirib.

"Heç nə üçün gec deyil" – deyə, Tramp müvafiq suala cavab verib.

Onun sözlərinə görə, Tehran Vaşinqtonla əlaqə saxlayır və hətta Ağ Evdə danışıqlar aparmağı da təklif ediblər. Bununla belə, Tramp ABŞ-ın İrana hərbi zərbə endirməyə yaxın olub-olmadığı barədə ətraflı məlumat verməkdən imtina edib.

“İrana zərbələr endirəcəyik mi, deyə bilmərəm. Onlara (İran tərəfinə - red.) Ağ Evə gəlməyi təklif etdim. Bu böyük bir addım idi, amma bu addımı atmadılar. Hazırda nə olacağını bilmirəm. Dünən [Rusiya prezidenti Vladimir] Putinlə danışdım və o, mənə vasitəçilikdə kömək edə biləcəyini dedi. Çox sayda insan ölüb. Biz qeyd-şərtsiz təslim olmalarını istəyirik. Əgər artıq bunu etməsələr, onların obyektlərini havaya uçuracağıq. Hələ heç nə əldə etməmişik, amma çox yol qət etmişik. Burada düşmən bir ölkənin (İranın - red.) nüvə silahlına sahib olma istəyini görürük. Biz illərdir İran tərəfindən hədələnirik. Növbəti həftə vacib həftə olacaq. Bəlkə də bir həftədən də az müddətdə. Nə baş verəcəyini görəcəyik. Hələ heç nə bitməyib” - deyə, Tramp bildirib.

Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.