BAKI, AzerVoice

Amazon süni intellekt səbəbilə yaxın illərdə işçi sayını azaldacaq.

AzerVoice xəbər verir ki, Amazon şirkətinin baş direktoru Endi Jassy, süni intellektin şirkət daxilində istifadəsinin genişlənməsi ilə gələcəkdə bəzi sahələrdə daha az işçiyə ehtiyac duyulacağını bildirib.

BBC-yə əsasən, Jassy işçilərə ünvanladığı məktubda süni intellektin məhsuldarlığı artıracağını, lakin bəzi funksiyaların artıq insanlar tərəfindən deyil, texnologiya vasitəsilə yerinə yetiriləcəyini qeyd edib. “Bu gün gördüyümüz bəzi işləri görmək üçün daha az insana ehtiyacımız olacaq”, – deyə Jassy bildirib.

Onun sözlərinə görə, bu dəyişiklik bir neçə ildən sonra Amazonun korporativ işçi heyətinin sayının azalmasına gətirib çıxaracaq. O, həmçinin vurğulayıb ki, bu texnologiyalara uyğunlaşan əməkdaşlar gələcəkdə şirkət daxilində daha güclü mövqe tutacaqlar.

Qeyd edək ki, Amazon platformalarında satış edən 500 mindən çox satıcı artıq məhsul təsvirləri və promosyonlar hazırlamaq üçün süni intellekt alətlərindən istifadə edir. 2023-cü ilin sonuna qədər Amazon dünya üzrə 1,5 milyondan çox insanı işlə təmin edib və ABŞ-da Walmart-dan sonra ikinci ən böyük işəgötürəndir.