BAKI, AzerVoice

Trampın adı Epstein sənədlərində var, ona görə də onlar açıqlanmır.

AzerVoice xəbər verir ki, Tesla və SpaceX-in rəhbəri, eyni zamanda X (keçmiş Twitter) platformasının sahibi olan Elon Musk Ceffri Epşteyn işi ilə bağlı mübahisəli açıqlama verib.

Musk cümə axşamı gecə X hesabında paylaşdığı yazıda “Trampın adı Epstein sənədlərində var. Faylların ictimaiyyətə açıqlanmamasının əsl səbəbi budur.” - deyə bildirib.

Paylaşımını “Gününüz xoş keçsin DJT!” sözləri ilə tamamlayan Musk, dolayısıyla Trampa birbaşa müraciət edib. Qeyd edək ki, “DJT” ifadəsi tez-tez Donald J. Trump-ın abreviaturası kimi istifadə olunur.

Milyarder sahibkar bu iddiasını əsaslandırmaq üçün heç bir sübut təqdim etməyib və sənədlərə necə çıxış əldə etdiyini açıqlamayıb.

Xatırladaq ki, bir müddət əvvəl Tramp administrasiyası tərəfindən dövlət xərclərinə nəzarət üçün yaradılan Hökumətin Səmərəliliyi Departamentinə (DOGE) rəhbərlik edən Elon Musk, ötən həftə bu vəzifədən istefa verib. Bundan sonra o, Trampın təqdim etdiyi vergi və xərclər paketini “biabırçılıq” adlandıraraq kəskin tənqid edib.

Tramp isə cavabında Truth Social platformasında Muskdan hökuməti tərk etməsini xahiş etdiyini bildirib və onu “səbirli olmamaq” və “dəli olmaq”da günahlandırıb.

Qeyd edək ki, Ceffri Epstein yetkinlik yaşına çatmayan qızlara qarşı cinsi istismar və insan alveri ittihamı ilə 2019-cu ildə həbs olunmuş və məhkəməni gözləyərkən Nyu-York həbsxanasında ölü tapılmışdı. Onun ölümü rəsmi olaraq “intihar” kimi qeydə alınsa da, bu, ABŞ ictimaiyyətində və beynəlxalq mediada mübahisə doğurmuşdu.

Epstein ilə əlaqəli şəxslər arasında həmçinin sabiq prezidentlər Bill Klinton və Donald Tramp, Britaniya şahzadəsi Endryu, maq İllüziyaçı Devid Kopperfild və müğənni Maykl Ceksonun da adı hallanıb.