BAKI,AzerVoice

ABŞ Prezidenti Donald Trampın imzaladığı sərəncama əsasən, Əfqanıstan, Çad, Demokratik Konqo, Ekvatorial Qvineya, Eritreya, Haiti, İran, Liviya, Myanma, Somali, Sudan və Yəmən vətəndaşlarının ABŞ-a girişi təhlükəsizlik səbəbi ilə tamamilə qadağan olunub.

AzerVoice xəbər verir ki, Trampın bəyanatında bildirilib ki, “təhlükəsiz və etibarlı yoxlamadan keçirə bilmədiyimiz heç bir ölkədən açıq miqrasiya qəbul edə bilmərik”.

O, bu səbəbdən Yəmən, Somali, Haiti, Liviya və digər ölkələr üçün yeni səyahət qadağası tətbiq etdiyini vurğulayıb.

Həmçinin, qərar Burundi, Kuba, Laos, Sierra Leone, Toqo, Türkmənistan və Venesuela vətəndaşlarının ABŞ-a girişinə də məhdudiyyətlər qoyur.

Qeyd edək ki, sərəncam qüvvədə olan vizalara və ABŞ-da daimi yaşamaq icazəsi olan şəxslərə şamil edilmir.

Xatırladaq ki, Donald Tramp prezidentliyinin ilk dövründə, 2017-ci ildə də oxşar bir qərar qəbul edərək İran, İraq, Liviya, Suriya, Somali, Sudan və Yəmən vətəndaşlarının ABŞ-a girişini qadağan edib. Daha sonra bu siyahıya Çad, Şimali Koreya və Venesuela da əlavə olunub.