BAKI, AzerVoice
Alman hökuməti İsrailə qarşı mövqeyini dəyişib və gələcəkdə siyasi fəaliyyətləri də dəyişə bilər.
AzerVoice xəbər verir ki, bu fikri Almaniya Xarici İşlər Naziri Yohann Vadeful səsləndirib.
Vadeful İsrail hökumətinin bəzi davranışlarının tənqid edilməli olduğunu bildirib və Almaniya kansleri Fridrix Merslə birlikdə bu mövzuda açıq danışdıqlarını vurğulayıb.
Almaniya hökumətinin Qəzza ilə bağlı mövqeyindəki dəyişikliyi izah edən Vadeful, bölgəyə həftələrlə humanitar yardımın daxil olmasına icazə verilməməsini əsas gətirib.
O, Almaniya hökuməti adından İsrail hökumətindən bu vəziyyəti düzəltməsini istədiyini və yeni planlaşdırılan yardım paylanma sistemini böhrandan çıxış üçün praqmatik yol kimi qəbul etməyə belə hazır olduğunu bildirib. Lakin təxminən üç həftə sonra bu sistemin işləmədiyini və gələn yardımların yalnız “isti daşın üzərində bir damla” kimi qaldığını etiraf edib.
“Bu, əsas insan hüquqları ilə əlaqədardır. İlk olaraq xəstələr və uşaqlar ölür. Nəticə etibarilə bu məsələyə baxışımızı dəyişdirdik və növbəti mərhələdə yəqin ki, siyasi fəaliyyətlərimizi də dəyişəcəyik,” deyə, nazir qeyd edib.
“Bu məsələnin necə olacağını indi dəqiq deyə bilmirəm. İsrail hökumətinin indi siyasətini dəyişmək üçün şansı var” - deyə, o əlavə edib.
Vadeful Almaniyanın İsrailə silah satışı məsələsinin Federal Təhlükəsizlik Şurasında müzakirə edildiyi üçün ictimaiyyətə açıqlanmadığını bildirib
“Prinsipcə, İsrailin Almaniyadan silah aldığı bəllidir. Bu həmişə belə olub. İsrail Husilər, Hizbullah və İran tərəfindən müxtəlif ciddi təhlükələrlə üzləşir və özünü müdafiə edə bilməlidir, o cümlədən alman silah sistemləri ilə”, - o qeyd edib.
Vadeful, Qəzza zolağında baş verənlərin beynəlxalq humanitar hüquqa uyğun olub-olmaması məsələsinə də toxunub.
“Biz bunu araşdırırıq və əgər lazım olsa, bu təhlilə əsaslanaraq əlavə silah tədarükünə icazə verəcəyik" - deyə, o bildirib.
İsrailin təhlükəsizliyinin Almaniya üçün dövlət prinsipi olaraq qalacağı ilə bağlı suala Vadeful belə cavab verib: “Bəli, çünki yəhudilərin öz dövlətlərində təhlükəsiz hiss edə biləcəkləri yeganə yurd buradır. Biz İsrail dövlətinin maraqlarını müdafiə edirik, lakin bu, əlbəttə ki, bir hökumətin istədiyini edə biləcəyi anlamına gəlmir”