BAKI, AzerVoice

Türkiyənin xəzinə və maliyyə naziri Mehmet Şimşək bildirib ki, ölkə artıq öz enerji və resurslarını terrorla mübarizəyə deyil, inkişaf və sabitliyə yönəldəcək.

AzerVoice xəbər verir ki, Şimşək bu fikirləri Londonda Avropa Yenidənqurma və İnkişaf Bankının təşkil etdiyi “Türkiyənin iqtisadi transformasiyası və artan investisiya potensialı” adlı panel müzakirəsində çıxışı zamanı deyib.

O, terrorla mübarizəyə ayrılan böyük resursların indi Şərq və Cənub-Şərqi Anadolu bölgələrinin yenidən qurulmasına sərf olunacağını vurğulayıb.

Nazir çıxışında qeyd edib ki, bu yeni mərhələ təkcə Türkiyənin daxili sabitliyini deyil, eyni zamanda Suriya və İraq kimi qonşu ölkələrin də iqtisadi və sosial dirçəlişini təşviq edəcək.

“Artıq enerjimizi və qaynaqlarımızı terrorla mübarizəyə sərf etməyəcəyik. Bunun əvəzinə, ölkənin gələcəyinə sərmayə qoyacaq, inkişafa yönələcəyik. Hər kəs sülh və sabitlikdən faydalanacaq, çünki rifaha aparan yeganə yol budur.”- deyə o deyib.

Qeyd edək ki, PKK ilə aparılan uzunmüddətli mübarizə illərdir Türkiyənin iqtisadi resurslarının və sosial gücünün böyük bir hissəsini məhdudlaşdırırdı. Son dövrlərdə bu təşkilatın təsirinin azalması və silahı yerə qoyması ölkənin iqtisadi sabitliyi və regional inkişafı üçün yeni imkanlar yaradır.