BAKI, AzerVoice
İsrail baş naziri Benyamin Netanyahu bazar ertəsi günü ABŞ prezidenti Donald Trampla Ağ Evdə görüş keçirəcək.
AzerVoice xəbər verir ki, görüşdə Trampın İsrail də daxil olmaqla bir sıra ölkələrə tətbiq etdiyi gömrük rüsumları ilə bağlı müzakirələr aparılacaq.
Görüşdə gömrük rüsumları ilə yanaşı Qəzzadakı son vəziyyət, İranla müharibə ehtimalları, Tehranın regiondaki təsirinə qarşı tədbirlər və İsrail ilə ikitərəfli münasibətlər də müzakirə ediləcək.
Xatırladaq ki, Tramp ötən həftə 60 ölkəyə, o cümlədən İsrailə də 17%-lik yeni gömrük rüsumları tətbiq etdiyini açıqlamışdı.
İsrailin sənaye birliyi bu qərarın iki ölkə arasında ticarət münasibətlərinə mənfi təsir göstərəcəyindən narahat olduğunu bildirib. Təşkilat xəbərdarlıq edib ki, bu qərar ixracat sektoruna zərər vura bilər, iş imkanlarını azalda bilər və iqtisadi sabitliyə təhlükə yarada bilər. Tariflər elektrik avadanlıqları, optik və tibbi cihazlar, mexaniki maşınlar və dərman preparatları kimi malları əhatə edir.