Bakı, AzerVoice

Kremlin xarici siyasət müşaviri Yuri Uşakov Ukraynada müvəqqəti atəşkəsin yalnız Ukrayna ordusu üçün bir möhlət olacağını bildirib və Rusiyanın əsas məqsədinin uzunmüddətli sülh yolu ilə həll tapmaq olduğunu vurğulayıb.

AzerVoice xəbər verir ki, Uşakov verdiyi açıqlamada ABŞ-ın milli təhlükəsizlik müşaviri Mayk Valsın onunla əlaqə saxladığını və Kiyevlə əldə olunmuş razılaşma barədə məlumat verdiyini qeyd edib.

O, ABŞ-la müntəzəm təmasda olduğunu, lakin Rusiyanın Ukraynada təklif olunan müvəqqəti atəşkəsə skeptik yanaşdığını bildirib.

“Məqsədimiz hələ də uzunmüddətli sülh yolu ilə həllə nail olmaqdır. Biz qanuni maraqlarımızı nəzərə alan sülh yolu ilə həll üçün çalışırıq. Dinc hərəkətləri imitasiya edən belə addımlar heç kimə lazım deyil”, – deyə Uşakov əlavə edib.

O, həmçinin ABŞ-ın gələcək diplomatik addımlarda Rusiyanın mövqeyini nəzərə alacağına ümid etdiyini ifadə edib. Bununla yanaşı, ABŞ prezidenti Donald Trampın Yaxın Şərq üzrə xüsusi nümayəndəsi Stiv Vitkoff və Rusiya prezidenti Vladimir Putin arasında mümkün görüş barədə sualları cavablandırmaqdan imtina edərək, bu mövzuda aparılan danışıqların məxfiliyinin qorunduğunu vurğulayıb.

Qeyd edək ki, Rusiya və Ukrayna arasında davam edən münaqişə ilə bağlı müvəqqəti atəşkəs təklifləri daha əvvəl də gündəmə gəlib, lakin Moskva bu cür təşəbbüslərə ehtiyatla yanaşaraq uzunmüddətli sülhə üstünlük verdiyini bildirib.