BAKI,AzerVoice

Filippini təsiri altına alan həddindən artıq isti hava şəraiti, bəzi şəhərlərdə məktəblərin müvəqqəti bağlanmasına səbəb olub.

AzerVoice xəbər verir ki, hava temperaturunun artması səbəbindən paytaxt Manila başda olmaqla məktəblərdə tədbirlər gücləndirilib.

Manila meri Honi Lakuna, sosial media hesabında paylaşım edərək, Milli Fəlakət Riskinin Azaldılması və İdarəetmə Şurasının həddindən artıq isti havalara dair tövsiyəsi əsasında paytaxtdakı məktəblərdə tədrisə ara verildiyini açıqlayıb.

Lakuna bildirib ki, səhər saatlarında 36-38 dərəcə arasında dəyişən hava temperaturunun günorta saatlarında 42 dərəcəyə çatacağı gözlənilir.

Manilanın yanaşı Las Pinas, Paranaque və Marikina şəhərlərində də məktəblərin müvəqqəti bağlandığı qeyd edilib.

Filippin Səhiyyə Nazirliyi, isti havaların yaratdığı sağlamlıq problemləri ilə bağlı xəbərdarlıq edib.

Açıqlamada bildirilib ki, istilik nəticəsində baş ağrısı, qusma və baş gicəllənməsi kimi hallar yaşana bilər. Vaxtında müdaxilə olunmadıqda isə huşunu itirmə, qıcolmalar və hətta günvurma nəticəsində ölüm riski yarana bilər.

Sakinlərə yaxşı havalandırılan, kölgəli və sərin yerlərdə qalmaq, baş, üz, boyun, qoltuqaltı, ayaq biləkləri və qasıq nahiyələrinə soyuq kompres tətbiq etmək tövsiyə edilib. Bundan əlavə, bol su içmək və günorta saatlarında açıq havada keçirdikləri vaxtı minimuma endirmək məsləhət görülüb.