BAKI, AzerVoice, Nərmin Ağayeva

Türkiyənin xarici işlər naziri Hakan Fidan Fələstin məsələsində kollektiv müdaxilənin vacibliyini vurğulayıb.

AzerVoice xəbər verir ki, İslam Əməkdaşlıq Təşkilatının (İƏT) Ciddədə keçirilən fövqəladə iclasında sədrliyə Hakan Fidan rəhbərlik edib. Nazir Fidan iclasda çıxış edərək, Fələstin xalqının üzləşdiyi problemlərin həlli üçün beynəlxalq ictimaiyyətin birgə səylərinin zəruriliyini qeyd edib. O, İsrailə qarşı koordinasiyalı və güclü təzyiqin vacibliyini vurğulayaraq, Qəzzanın gələcəyə hazırlanması üçün ərəb-İslam dünyasının əlindən gələni etməli olduğunu bildirib.

Fidan həmçinin İsrailin Fələstinlərə qarşı hücumlarının regionda sabitliyi pozan daha geniş bir planın bir hissəsi ola biləcəyini ifadə edərək, Netanyahu rejiminin Suriya, Livan və İrana qarşı həyata keçirdiyi qeyri-qanuni əməliyyatların Yaxın Şərqdə ciddi təhdidlər yarada biləcəyini diqqətə çatdırıb. Nazir, bu vəziyyətin qarşısını almaq üçün qətiyyətli mövqe nümayiş etdirilməsinin vacibliyini vurğulayıb və Fələstin xalqının tezliklə azadlıq, sülh və ədalətə qovuşacağına ümid etdiyini bildirib.

Qeyd edək ki, bu iclas İsrailin Fələstin xalqına qarşı davam edən hücumları və Qəzzada əməliyyatlarını genişləndirmək qərarı ilə bağlı çağırılıb.