BAKI, AzerVoice

Türkiyə Misirlə enerji sahəsində əməkdaşlığı genişləndirmək niyyətindədir.

AzerVoice xəbər verir ki, Türkiyənin Enerji və Təbii Sərvətlər naziri Alparslan Bayraktar iki ölkə arasında enerji əməkdaşlığının genişləndirilməsinin vacibliyini vurğulayıb.

Bu barədə o, Ankaradakı Misir səfirliyində keçirilən Misir Milli Günü tədbirində çıxış edərkən bildirib.

Nazir Bayraktar çıxışında bərpa olunan enerji, LNG ticarəti, karbohidrogen kəşfiyyatı, enerji infrastrukturları və nüvə enerjisi kimi sahələrdə əməkdaşlığın daha da inkişaf etdirilməsinin hədəfləndiyini bildirib. O qeyd edib ki, hazırda Türkiyə ilə Misir arasında ticarət həcmi 10 milyard dollara yaxınlaşır, türk iş adamları isə Misirdə 3 milyard dollardan çox sərmayə qoyublar.

Bayraktar həmçinin yay aylarında Türk FSRU (üzən LNG saxlama və qazlaşdırma) gəmisinin Misirdə xidmət göstərəcəyini açıqlayıb. Bu, BOTAŞ və Misirin EGAS şirkəti arasında imzalanmış müqavilə çərçivəsində həyata keçiriləcək. Onun sözlərinə görə, bu əməkdaşlığın nəticələri yaxın vaxtlarda daha aydın görünəcək.

Qeyd edək ki, Türkiyə və Misir arasında diplomatik əlaqələrin 100 illiyi qeyd olunur. Son illər ərzində münasibətlərdə müşahidə olunan istiləşmə, xüsusən enerji sahəsindəki əməkdaşlığı daha da gücləndirmək üçün yeni imkanlar yaradır.