BAKI,VOA,Yusif Şərifzadə

Livanda dörd ay əvvəl başlayan münaqişə nəticəsində didərgin düşən insanların bir hissəsi evlərinə qayıtsa da, çoxları dağıdılmış yaşayış məntəqələri və ağır infrastruktur problemləri səbəbindən normal həyata dönə bilmir.

VOA xəbər verir ki, Birləşmiş Millətlər Təşkilatı və Livan hökumətinin açıqladığı son statistikaya əsasən, münaqişə zamanı didərgin düşmüş bir milyondan çox insanın təxminən 40 faizi artıq yaşadığı ərazilərə qayıdıb. Lakin geri dönənlərin əksəriyyəti dağıdılmış və ya ciddi zərər görmüş evlərlə üzləşib.

Məlumata görə, bəzi ailələr yaşayış evləri istifadəyə yararsız olduğu üçün onların yaxınlığında çadırlarda məskunlaşmağa məcbur qalıb. Bir sıra kəndlərdə isə dağıntıların miqyası səbəbindən yaşayış demək olar ki, mümkün deyil.

Yerli rəsmilər bildirirlər ki, elektrik şəbəkəsi, su təchizatı və rabitə infrastrukturu ciddi ziyan gördüyündən ərazilərin bərpası üçün kifayət qədər maliyyə vəsaiti yoxdur. Bu səbəbdən insanların təhlükəsiz şəkildə evlərinə qayıtması və normal həyatın bərpası ləngiyir.

Bildirilib ki, didərgin düşənlərin təxminən 60 faizi hələ də evlərinə qayıda bilmir. Onların əhəmiyyətli hissəsi İsrail ordusunun nəzarətində olan ərazilərdən köçkün düşən sakinlərdir. Hökumətin məlumatına görə, indiyədək təxminən 90 min yaşayış evi tamamilə dağıdılıb və ya ciddi zərər görüb.