BAKI,VOA, Orxan Qədirzadə

İsrailin Baş naziri Binyamin Netanyahu hökumət üzvlərinin ABŞ Prezidenti Donald Tramp və Vaşinqtonun İranla əldə etdiyi razılaşma barədə səsləndirdiyi tənqidi fikirlərin onun şəxsi mövqeyini əks etdirmədiyini amerikalı tərəfdaşlara çatdırmağa çalışır.

Məlumata görə, Netanyahu son günlər Ağ Evlə münasibətlərdə yaranan gərginliyi azaltmaq üçün bir sıra addımlar atır. Baş nazir israilli nazirlərin sosial şəbəkələrdə paylaşdıqları və ABŞ-İran razılaşmasını, eləcə də Donald Trampı hədəf alan açıqlamalarına münasibət bildirərək, həmin fikirlərin hökumət rəhbərinin rəsmi mövqeyi ilə üst-üstə düşmədiyini izah etməyə çalışıb.

İsrail mediasının məlumatına əsasən, Netanyahu daha əvvəl də hökumət daxilində mübahisələr yaranarkən qərarların yalnız onun tərəfindən qəbul edildiyini vurğulamışdı. Bu dəfə isə vəziyyət daha həssas hesab olunur, çünki tənqidlər birbaşa ABŞ prezidentinə yönəlib.

Məlumatlarda qeyd edilir ki, ABŞ-nin vitse-prezidenti Cey Di Vens bəzi israilli nazirlərin Tramp əleyhinə çıxışlarına reaksiya verərək, Təl-Əvivin Vaşinqtonun göstərdiyi dəstəyi nəzərə almalı olduğunu bildirib.

Vens vurğulayıb ki, İsrailin müdafiə məqsədilə istifadə etdiyi silahların əhəmiyyətli hissəsi ABŞ tərəfindən təmin edilir. Onun sözlərinə görə, Donald Trampı problem kimi görən siyasi dairələr mövcud reallığı obyektiv şəkildə qiymətləndirməlidirlər.

ABŞ rəsmisinin açıqlamaları İsrail hökumətində narazılıq yaradıb. Milli Təhlükəsizlik naziri İtamar Ben-Qvir və maliyyə naziri Betsalel Smotriç onların Tramp əleyhinə çıxışlarına görə ünvanlanan tənqidlərə mənfi münasibət bildiriblər.

Müşahidəçilər hesab edirlər ki, ABŞ-İran münasibətlərində yeni mərhələnin başlanması fonunda Vaşinqton və Təl-Əviv arasında yanaşma fərqlərinin artması İsrail daxilində də siyasi müzakirələri dərinləşdirə bilər.