BAKI,VOA,Yusif Şərifzadə

Livan Prezidenti Jozef Aun və İranın xarici işlər naziri Abbas Əraqçi telefon danışığı zamanı bölgədəki son vəziyyət və İran-ABŞ razılaşmasının mümkün nəticələri ətrafında fikir mübadiləsi aparıblar.

VOA xəbər verir ki, bu barədə Livan Prezident Administrasiyası məlumat yayıb.

Məlumata görə, Aun söhbət zamanı Livanın sabitliyi, təhlükəsizliyi və dövlət suverenliyinin ölkənin əsas milli prioritetləri olduğunu vurğulayıb.

Livan prezidenti bildirib ki, İran və ABŞ arasında əldə olunan anlaşmanın bölgədə gərginliyin azalmasına və diplomatik həll yollarının önə çıxmasına töhfə verəcəyinə ümid edir.

Onun sözlərinə görə, mövcud vəziyyət dialoq və siyasi həll mexanizmlərinin gücləndirilməsini zəruri edir.

Abbas Əraqçi isə bütün tərəflərin Livanın suverenliyinə və ərazi bütövlüyünə hörmət etməsinin vacibliyini vurğulayıb.

İranlı nazir əldə olunan anlaşmanın yaratdığı müsbət atmosferin Livanda sabitliyin möhkəmlənməsinə kömək edə biləcəyinə ümid etdiyini bildirib.

Tərəflər regional təhlükəsizlik və siyasi sabitlik məsələlərinin əhəmiyyətini də xüsusi qeyd ediblər.